خطوات تعليم الحمام ومشاكله ..

السلام عليكم و رحمة الله وبركاته .. 

بالنسبه ليا هذا اول هم اشيله اول ما احمل .. 

ههههههه لا مو لهالدرجة ههههه 

لكن فعلا تعليم الحمام هم كبييير تشيله الام .. 

لانها مرحله توتر للام وللطفل  ..

ويبغالها وقت .. وضغط نفسي .. 

اول شي بس ابغا كل ام جديدة تعرف ان تعليم الحمام فتره فخر للام وللطفل .. 

وكأنها تخرج من مرحلة لمرحلة هههههه .. 

خلاص ترتاح الام من هم الوساخة و العفن والطفل يبدأ خطوات استقلاله بنفسه ..

Product-BabyBjorn-PottyChair3

افضل سن لتعليم الحمام : 

تعليم الحمام يبدأ من ١٨ شهر ( سنه ونص ) الى ٣ سنوات .. 

هذا عمر تعليم الحمام .. قبل كذا الطفل صغير مره ولا يتحكم في نفسه ولا يركز ولا يتذكر ( الا ماندر )  

وبعد الثلاث سنوات خلاص يعتبر هو يعلم نفسه ههههه .. 

اهم شي يكون الوقت مناسب لطفلك .. يبغا يتعلم .. مستعد .. 

اما اذا عملتيه وهو مو مستعد فماراح تعلمين الا نفسك لانك قاعده تتعبي على الفاضي ههههه 

453109bafed56a64132489abf3fc164a

 وقت تعليم الحمام : 

متى تعرفين انه جاء وقت تعليم الحمام … !!

  • – تصيري تلاحظي بعض الاحيان تكون الحفاظه جافه لوقت طويل .
  • – يصير طفلك عنده فضول كبير في مناطقه الحساسه . 
  • – طفلك يصير يعرف ( البول و الغائط ) اذا تكلمتي عنهم قدامه . ( بكلمات يفمهما )
  • يعني مثلا تقولين له تعال اغير لك الحفاظه فيه كيكا او اوشو .. وعلى طول يستجيب لك ..
  • – اكثر خطوه مهمة واكبر وحده لمن يصير طفلك يبغاكي تغيرين له ويشتكي لك من الحفاظ .
  • – وخطوه اكبر كمان لمن يصير يفك الحفاظ مايبغاها او يتضايق منها . 

مو لازم تكون كلللل هذه الخطوات في طفلك عشان يكون اكيد قابل للتعليم .. 

الاطفال يختلفون .. لكن اذا توفرت كم وحده فهو قابل ان شالله .. 

potty_training_reset-e1335214741112

احتياجات التدريب : 

  • – القصريه او البوتي او النونيه : 
  • هذه اهم شي تجيبيها للطفل ويكون حجمها مناسب لحجم الطفل .. 
  • انتبهي لاتكون صغيره عليه ، لازم تكون مريحه له مافيها تصميم يعور فخوذه او مقعده .. 
  • لانه في اشكال غبيه الصراحة ، ولازم تكون تحتوي مقعده بشكل مريح .. 
  • في اهم امهات يحبو يختارو الي تتركب على كرسي الحمام الكبير وهذه غير مناسبه عادة لاطفال الي دوبهم يتعلمو ، اولا مايوصلون لها بسرعه الا بمساعدتك  خصوصا اذا كان عمرهم سنتين واقل  + كثير اطفال يخافو من الكرسي ويحسون انهم بيطيحون فكذا يصير رده الفعل عكسيه و مو في صالح تعليم الحمام ، الا في حاله انه كان شجاع ماشالله هههههه . 

 – السروايل المبطنه  : 

هذه نعمة كبيره هههههه .. ممكن تسرب لكن ماتعبي لك الارض بحيرات وانهار ههههه ..ضروريه لازم تشتري لك درزنين ولا تقولي كثيره لانك راح تغسلينهم كلهم يوميا ههههه  ، لا امزح ان شالله مو لهالدرجة ههههه .. لكنها تنفع بقوه .. 

  • – الحفايظ الي بشكل سروال : 

هذه اختلفو فيها كثير الناس ناس قالوا تسبب توتر للطفل لانه مايعرف هل هي حفاظه او لا .. وسوبر ناني من الناس الي ماتفضلها .. ممكن تستخدميها في حال علمتي الطفل انها سروال مش حفاظه ، هي مشكلتها ان الطفل اذا تعلم عليها ماراح يحس بنفسه ، يعني وقت التدريب بدون حفاظ لمن الطفل يسوي البول ويشوفها نازله على رجله وعلي الارض والام تقوله لا كذا غلط لازم الحمام ، هذه من الخطوات المهمة وقت التدريب انه يشوف البول اذا ماكان في مكانها المناسب ( القصريه ) كيف راح تكون ! لكن السروال الحفاظ مايشوف الطفل شي فممكن هذه من سلبياتها .. لكن هيا حلوه بعد مرحله التدريب .. لمن يصير الطفل خلاص عارف وين يسوي حاجته .. وطلعتي به السوق او عند ناس ، حلوه تلبسيه السروال الحفاظ .. واذا قالك ابغا الحمام تودينه وكانه لابسه سروال ..تفصخينه وترجعين تلبسيه ، واذا ما قدر يمسك نفسه او نسى يقولك وعمل عمليته كذا ماتكوني انحرجتي برا البيت .. 

baby-potty-training

اهم عوامل التدريب الناجح : 

  • – الام مستعده نفسيا .. و البيت مستقر .. مافي اجازه مافي ضيوف داخلين وطالعين 
  • تكون الام متفرغه تماما ومستعده نفسيا .
  • – الطفل مستقر نفسيا .. امه حوله على طول .. مافي بيبي جديد لان الغيره ماتناسب تعليم الحمام ابدا 
  • على العكس في اطفال متعلمين عالحمام  وينتكسون في حاله جا البيت بيبي جديد . 
  • – تنظيم الشرب والاكل في ورقه .. على الاقل اول اسبوع من التدريب على الحمام .. تسوي الام جدول او ملاحظات في جوالها متى اكل ومتى شرب .. وتسجل متى بعدها احتاج الحمام ، كذا الام نظمت واحتوت الموضوع بطريقه ناجحة .
  • – اختيار الشهر المناسب .. معروف ان فصل الشتاء اسوء فصل لتعليم الحمام الا في حاله كان بيتك في تدفئه مركزيه شامله .. وكان البيت دافي .. لان البرد يزيد الحاجة للتبول + في تعليم عالحمام نلبس الطفل ملابس خفيفه لسرعه التفصيخ واللبس هههههه .

اسلوب الام في التدريب :

  • انتي يا ام فلان اهم عامل في التدريب .. انتي المحفز و انتي المثبط ..
  • خليكي صبوره ولا تعلي صوتك ولا تهاوشي ولا تضربي طبعا مايحتاج اقول 
  • اذا عليتي صوتك او غضبتي عليه انتي عارفه ان هالشي راح يخوفه و مو في مصلحته .. 
  • الاطفال انواع .. انا بقولك  شي اكيد ان طفلك راح : 
  • ينسى 
  • ينشغل
  • لا يهتم 
  • يأجل الموضوع 
  • والبعض ماعليه ويسويها على نفسه ويلعب ولا كنه شي .. 
  • وغيره من هالتصرفات المستفزه ..

انصحك بالهدووووء و التصرف وكانك ملكه خايفه على برستيجها ههههه .. استهدي بلله دايما تراها فتره وتعدي بسرعه .. اذكري الله على طول هههه لاني اعرف في اليوم ممكن كم مره تكوني مغيره له وممسحه ومنظفه الارض .. وممكن تكون عندك ضغوطات زوجيه او اجتماعيه او نفسيه ومنتي ناقصه توتر .. 

لكن ابغاكي تتذكرين ..

انها فتره وتعدي .. كل الامهات مرو بهالمرحلة واولهم امك وهي تعلمك .. اسألي امك عن حكاوي تعليم الحمام هههههه .. كل ام لها قصصها المؤلمه هههههه .. فخذي الموضوع بروح صبوره .. عشان طفلك .. وربي يعينك ان شالله ويقويكي .. 

اذا حصلت حادثه فضيعه وشنيعه عالارض هههه ابغاكي تجلسي لمستوى طفلك .. وتقولي له بحزم ليش مارحت القصريه وليش ماقلت لماما ( باسلوبك الحازم وبكلمات يفهمها طفلك منك ) نظفي الوسخ وخليه يساعدك بشي بسيط  وخليكي حزينه وكنك شغاله مظلومه ههههه ، ارجعي اجلسي عند طفلك وقولي له مره ثانيا قول لماما طيب .. وانتظري منه الرد كرري سؤالك الين يرد عليكي بطيب .. او اطلبي منه يقولك طيب .. عطيه بوسه وحظنه وروحي كملي شغلك هههه ، اهم شي لا تشدي عليه ترى الوضع جديد بالنسبه له وموتره لكن مايبان على الاطفال ..

الطرق  مختلفه بين ام وام ممكن تبحثي في جوجل وتلاقي بين المنتديات كثير قصص وتجارب مفيده ماشالله ربي يكتب اجر كل وحده حطيت تجربتها للافاده .. 

تجربتي مع بناتي : 

بنتي الاولي علمتها تقريبا عالسنتين و٣ شهور تقريبا .. ماشالله بسرعه تعلمت لان شخصيتها تحب تسوي الشي الصح .. تعبتني اول اسبوع .. كانت وقت البول تجلس عالارض وتتفرج على النهر الجاري ههههه .. يعني بالزبط فضاوه ههههه .. صرت اخر شي اعرف اذا جلست بذيك الطريقه انها بتسويها فاشيلها فورا و اوديها الحمام عالقصريه .. ماشالله الاسبوع الثاني احسن .. وبعد شهر خلاص انتهينا من الحفاظ نهار وليل ..

بنتي الثانيه كانت تحدي صعب .. بديت فيها عالسنتين و ٣شهور .. اسبوع واحد وابدا ماحسيت انها تحسنت فعرفت انها غير مستعده .. بديت بعدين شهرين نفس الوضع ،، اسبوع وحسيتها هي نفسها ماتبغا تتعلم وغير مهتمه ابدا .. واجلت الموضوع الين صارت سنتين و ٧ شهور وتعلمت الحمدلله .. كان موضوعها اسهل لان عندها اخت اكبر منها فتشوفها وتتعلم منها وتكلمها اختها وتحمسها وتشجعها وتذكرها .. 

بنتي الثانيه حطيت لها القصريه قريبه من غرفه العابها ( مع قطعه اسفلها لتغييرها وقت توسيخها ) حتى تشوفها وتتذكر لان شخصيتها غير مهتمه وتحب اللعب ،، واصير كل ١٠ دقايق اذكرها بها .. اذا في اوشو شوفيها هنا و اوريها هيا .. الين صارت بنفسها تروح لها … ولمن صرت اشوفها مهتمه اكثر واستقرت دخلتها في الحمام .. كل ام وتشوف طفلها كيف وتختار له طريقه تذكره  .. 

potty-training

التشجيع و المكآفأه : 

طبعا تعليم الحمام مانبغا فيه عقاب ابدا نبغا مكافأه فقط .. كثير اساليت التشجيع .. طفلك ايش يحب ، ايش يرضيه .. ايش يشجعه .. ! اذا الاستكرات يحبها ويستهويها جيبي له بوستر بصورته او برسمته وحطي له نجوم او قلوب كل مره يسويها صح .. او ممكن هو بنفسه يحط الاستكرات في بوستر او على القصريه او اي مكان هو يختاره .. ممكن طفلك يحب الحلوى ( بحدود ) او الكب كيك .. ممكن طفلك يحب تشجيع او مديح من شخص مثلا ابوه او خاله او خالته او جدته .. يصير تشجعيه بهم ويصير يكلم اللي يبغا ويحكيه حتى يشجعه خاله او جدته ولو يجيبون له هديه بمناسبة هذا التطور الكبير احسن واحسن .. 

طبعا مايحتاج اتكلم عن الحفله الي تسويها مع طفلك بعد المرات الاولى الي يسويها في المكان الصحيح ..افتكر بنتي الثانيه اذا سوت شي صح ، امسك يدين بنتي الكبيره ونقعد ندور واحنا نغني باسمها انها شاطره وتصير تفرح وتلبس بسرعه عشان تجي معانا تدور هههههه .. وكل مره هالحفله .. اختاري رقصه معينه تعبر عن فرحتك وسويها كل مره ينجح في المهمة .. يصير طفلك كذا متشوق للرقصه ويصير يسويها معاكي ههه كيوت ..

من الاشياء الي تشجع الطفل القصص و الاناشيد .. اقري له قصص اطفال يروحو الحمام و وريه صور اطفال يستخدمون القصريه .. في مقاطع في اليوتيوب اختاري الي يناسبك .. تدريب اطفال او اغاني كرتونيه في كثير افادتني وحبتها بنتي الثانيه لان نوعيتها تحب الكارتونات كثير .. وممكن تشتري لطفلك البيبي الي يجي معاه قصريه .. يصير يتأمر عليها ويوديها الحمام هههههه ..

weebooktada-copy-2

بعد ذلك : 

  • كيف تشغل السيفون .
  • كيف يفك زر البنطلون او يقفله 
  • كيف يغسل الفرج بعد قضاء الحاجة 

هذه كلها صعبه عليه وقت التعليم .. اصبري عليه .. غالبا يتقن هالاشياء الثلاث بعد الثلاث سنوات .. 

mom-potty-training-daughter-3

التدريب كلها فتره اسبوعين وتعدي بسرعه ان شا لله .. 

واذا خصلت الاسبوعين ومافي اي تطور بتاتا فهذا يعني ان طفلك غير مستعد .. 

اجلي الموضوع كمان شهر .. او حسب رغبتك والمامك بشخصيه طفلك .. 

تعليم الحمام مايصير في يوم وليله .. هو تطور .. 

يبدا ضعيف جدا .. يصير احسن .. افضل .. الين احترافي .. 

زيك انتي لمن تتعلمي شي جديد وصعب .. 

والاكيد الاكيد انه ماراح يروح الروضه وهو لسا ماتعلم 😉 

ان شالله يارب تكون المقاله مفيده للمحتاج ..

في أمان الله احبتي ..

ولا تنسو ابويا رحمة الله عليه من الدعاء .. 

وجزاكم الله خير ..

5 أفكار على ”خطوات تعليم الحمام ومشاكله ..

  1. اشكرك ع موضوعك للي استفدت منه … بس تبقى مشكلتي مع ابني مو راضي يتعلم للحين عمره ثلاث سنوات وشهرين ويروح للحمام وينظف نفسه بس لازم يعملها بالحفاظ مو راضي بغيرها… بس ع قولتك يبغى له صبر … وبسال بالنسبة للسراويل المبطنه اشوفها ضيقة في نوع معين تنصحيني فيه … وشكراً

    إعجاب

    1. طيب انتي تلبسيه الحفاظ يعني ؟ لا تلبسيه الحفاظ ابدا الا بعد ماينام ، ويبغالك تجلسي في البيت اسبوع تتفرغي له تماما وتراقبيه وتذكريه كل ربع ساعه اذا يبغا يروح الحمام ، لازم تشيلي الحفاظ عنه ان اشالله تتسهل لك يارب ، واذا حسيتي انه معند خلاص اتركيه وابدي كلميه عن الحمام وانه الكبار يروحو الحمام وانتي صرت كبير تمشي وعندك اسنان وتجري وتقدر تشيل الالعاب الكبيره ماشالله بطل وكذا وان شالله شويه شويه يصير يبغا يتعلم من نفسه .. السروايل المبطنه استخدمي حقت مذركير جربتيها ؟وعفوا حبيبتي ان شالله تتم الاستفاده

      Liked by 1 person

  2. رااااااائع ماشاء الله تبارك الله الموضوع شامل و موفي ، منجد انا تعلمت منك ان اهم شيء لا اعصب عليه وانه شيء طبيعي جدا الحين الحمدلله مر اسبوع و احس تخطينا المرحلة الصعبة ، الحمدلله ربنا يسعدك ❤️

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s